Fréttir 2025

03. nóvember 2025

Gleðilega viku

Kæru Korpúlfar

Skemmtinefndin minnir ykkur á að kaupa miða á jólagleði aldarinnar sem verður miðvikudaginn 19. nóvember í Gullhömrum.

Jólahlaðborð að hætti kokkanna í Gullhömrum, veislustjórn, skemmtiatriði og danshljómsveit miðaverð 14.000.-

Seldir eru miðar í dag 3 nóvember og á miðvikudag 5. nóvember í Borgum.

Síðan má millifæra inn á reikning Korpúlfa og fá miðana afhenda síðar, en miðarnir eru einnig happdrætti.

þessa vikuna viljum við minna á :

Fyrirlestur með næringarfræðing kl. 13:30, 4. nóv. í Borgum á vegum Frísk í Fjölni.
Erindi kl. 13:00 5. nóv. í Borgum með Sigurði Jóhannssyni um Heiðmörk á vegum fræðslunefndar.
Tölvuaðstoð/símaaðstoð með Sölva Steini kl. 9:00 á fimmtudag 6. nóv. skráning liggur frammi í Borgum.
Einar Már Guðmundsson verndari bókaklúbbs Korpúlfa mætir kl. 13:00 fimmtudaginn 6. nóv. með bókakynningu í Borgir.
Höldum áfram að hafa gaman saman

Birna

Mánudagur 27. október 2025

Gleðilegan vetur

Kæru félagar

Framundan er hjá okkur spennandi vetur, vonumst til að sjá ykkur sem oftast.

Þökkum áhuga á Jólagleði Korpúlfa (jólahlaðborði) sem verður miðvikudaginn 19. nóvember í Gullhömrum, takk til þeirra sem nú þegar hafa greitt miða 14.000 með millifærslu en miðarnir verða afhendir í Borgum e.h. í dag 27. okt. Skemmtinefndin hvetur alla til að taka með sér gesti í jólagleðina, hverjum hefur ekki dreymt um að skemmta sér með Korpúlfum.

Föstudaginn 19. des. kl. 20:00 eru 40 skráðir í leikhúsið á Rauðu Mylluna í Borgarleikhúsinu á vegum menninganefndar. Millifæra þarf greiðslu leikhúsmiða 13.900.- inn á reikn. Korpúlfa 0324-13-0920 kt. 601101-2460 fyrir 1. nóvember, þá er hægt að skoða biðlista í framhaldinu og einnig þarf að athuga áhuga á rútu.

Á miðvikudaginn 29. október kl. 13:00 boðar stjórn Korpúlfa til félagsfundar, sérstakur gestur með fræðslu er Ösp Árnadóttir frá Landlæknisembættinu, sönghópurinn Korpusystkin gleðja okkur með söngdagskrá, Egill Sigurðsson flytur 90 ára afmæliserindi og fleira óvænt og skemmtilegt. Við fögnum vetrinum saman, það verður gaman.

Fimmtudaginn 30. október verður farið í Rafíþróttir í Egilshöll f.h. og síðan kl. 13:00 í Borgum mun Ingibjörg Óskarsdóttir bjóða upp á myndasýningu með felumyndum frá ferðalögum hennar í lífinu.

Önnur hefðbundin dagskrá samkvæmt starfsskrá.

Hjartans kveðja

Birna og Theodór formaður Korpúlfa.

Þriðjudagur 21. október 2025

Margt spennandi framundan.

Heil og sæl

1. Minnum á Korpúlfa bingó á morgun miðvikudaginn 22. október kl. 13:00 í Borgum.

2. Þá boðar skemmtinefnd Korpúlfa til Jólagleði Korpúlfa í Gullhömrum 19. nóvember 2025, sem enginn vill missa af. Jólahlaðborð kokkana í Gullhömrum: Síldarréttir, graflax, pate og grafið lamb í forrétt. Hangikjöt, dönsk fleskesteik og lambafillet í aðalrétt með meðlæti. Toblerone ís kaffi og te. Skemmtiatriði, veislustjórn og Grímur og félagar leika undir dansi. Byrjað verður að selja miða á morgun strax eftir bingóið kl. 15:00 til 16:30 í Borgum.

3. Miðaverð 14.000 og miðinn er um leið happadrættismiði. Greitt með peningum einnig velkomið að leggja inn á reikning Korpúlfa 0324-13-0920 kt. 601101-2460. Velkomið að taka með sér gesti því allir eru hjartanlega velkomnir í jólagleðina.

4. Á fimmtudaginn 23. október á vegum menningarnefndar mun Hildur okkar Hákonardóttir kynna bók sína "Ef ég væri birkitré" kl. 13:00 í Borgum. Hvetjum alla til að mæta og hlusta á næmt auga listamannsins fyrir náttúru landsins og inn í heim þar sem mörk manns og náttúru eru óljós.

5. Leikfimin í Egilshöll næsta fimmtudag 23. október kl. 10:00 fellur niður vegna veikinda.

Hjartans kveðja úr Borgum,

Birna.

Þriðjudagur 14. 0któber 2025

Púttið hefst á fimmtudag 16. október.

KORPÚLFAPÚTTIÐ HEFST Á NÝ 16. OKTÓBER 2025.

Pútt Korpúlfa hefst eftir sumarfrí næsta fimmtudag 16. október 2025 kl. 10:00 á Korpúlfsstöðum.

Inniaðstöðu hjá Golfklúbbi Reykjavíkur gengið inn í gegnum ramp við vinstri hlið Korpúlfsstaða.

Pútt verður síðan fyrsta og þriðja fimmtudag í hverjum mánuði í vetur.

Gott að taka með sér pútter en skráningablöð verða til staðar.

Allir hjartanlega velkomnir í hópinn og kaffisamsæti í aðstöðu Korpúlfa á Korpúlfsstöðum á eftir.

Umsjónarmaður Korpúlfapútts er Hermann Guðmundsson.

Góða skemmtun.

Föstudagur 03. október 2025

Fyrir alla áhugasama.

Kæru Korpúlfar

Ferðanefnd Korpúlfa þakkar áhuga á dagsferðinni 15. október sem er uppseld og biðlisti. Skráðir þátttakendur beðnir að greiða þáttökugjaldið 4.000.- sem allra fyrst inn á reikning Korpúlfa. Arionbanki : 0324-13-0920 Kt. 601101-2460. Lagt verður af stað stundvíslega kl. 12:00 miðvikudaginn 15. október.

Fræðslunefnd Korpúlfa hvetur alla áhugasama að mæta næsta miðvikudag 8. október kl. 13:00 í Borgir á spjallfund með Sveini Kjartanssyni. Hinsegin fræðsla skemmtilegt fróðlegt spjall og spurningum svarað. Vonumst eftir góðri þátttöku.
Fimmtudaginn 9. október kl. 9:00 hefst á ný tölvuaðstoð Korpúlfa, skráningalisti liggur frammi í Borgum. Þann sama dag hittist bókmenntahópur menningarnefndar Korpúlfa kl. 13:00 tekin verður fyrir bókin Ótrúlega skynugar skepnur eftir Shelby Van Pelt. Einnig liggur frammi þátttökulisti í leikhúsferð 19. desember og hefur áður verið auglýst.

Minnum á að merkja í dagatalinu miðvikudagskvöldið 19. nóv. 2025 jólahlaðborð ársins hjá Korpúlfum í Gullhömrum. Enginn hámarks þátttaka og nú fá allir tækifæri til að skemmta sér gleðjast, dansa og hafa gaman með Korpúlfum. Velkomið að taka með sér gesti og skemmtinefnd Korpúlfa er byrjuð að undirbúa hátíðina, nánari dagskrá verður kynnt fljótlega.

Með hjartans ósk um góða helgi og gleðilega októberdaga.

Fyrir hönd okkar allra,

Birna.

Fyrirgefið fljótfærnina

Ætlaði einnig að minna ykkur á að vinsæla leikfimin í Egilshöll hefst í næstu viku

þriðjudaginn 7. október kl. 9:30 og 11:00 hjá Margréti Eiríksdóttur.

fimmtudaginn 9. október kl. 10:00 hjá Ársæli Guðjónssyni

Húrra og allir hjartanlega velkomnir.

Miðvikudagur 24. september 2025

Fjörugir haustdagar 2025

Kæru Korpúlfar

Haustdagarnir fara vel af stað hjá okkur, fjölgað hefur í öllu félagsstarfinu og skemmtinefndin okkar hefur verið að undirbúa í allan dag haustgleði ársins. Með fylgjandi mynd af skemmtinefnd Korpúlfa. Yfir 100 Korpúlfar ætla að mæta í fjörið í kvöld. Húsið opnar í kvöld 24. sept. kl. 18:30 og við lofum góðri skemmtun.

Deginum eftir fimmtudaginn 25. sept. er hægt að halda áfram dansinum í Borgum, því BOLLYWOOD danshópurinn mætir kl. 13:30 með dansleikfimi og gleði og allir hjartanlega velkomnir bæði að upplifa og taka þátt í dansinum.

Þá óskum við 50 Korpúlfum góðrar ferðar til Austurríkis 26. september rútan leggur stað kl. 3:30 stundvíslega frá Borgum til Keflavíkurflugvallar.

Ferðanefnd Korpúlfa kynnir dagsferð um Garðabæ, Álftanes og Hafnarfjörð, miðvikudaginn 15. október lagt af stað kl. 12:00 frá Borgum,farið verður í heimsókn á Bessastaði, Minjagarðinn í Garðabæ og kaffi verður hjá eldri borgurum í Hafnarfirði. Áætluð heimkoma kl. 16:30, Sigmundur Stefánsson verður leiðsögumaður verð 4.000.- Þátttökulisti liggur frammi í Borgum frá og með 25. sept. Hámarksfjöldi 50 manns.
Þá vekjum við athygli á smávægilegri breytingu á því að næsta Bingó skemmtinefndar verður miðvikudaginn 22. október kl. 13:00 í Borgum.

Með hjartans ósk um gleðilega haustdaga og fögnum góðum vetri saman.

Birna.

Föstudagur 05. september 2025

Kynningarhátíð og haustgleði Korpúlfa

Um leið og við óskum ykkur góðrar helgar viljum við minna ykkur á miðvikudaginn 10 sept. kl. 13:00 í Borgum.

Þá verður vetrardagskrá Korpúlfa kynnt með glæsibrag.

Einnig munu hjónin Jóhanna Þórhalls söngkona með meiru og Óttar Guðmundsson geðlæknir gleðja okkur með nærveru sinni og kátínu í lok dagskrár.

Kaffi og kleinur í boði hússins.

Síðan fer vetrarstarfið á fullt skrið m.a. með haustfagnaði um kvöldið miðvikudaginn 24 september

byrjað verður að selja miða næsta mánudag 8. sept. kl. 15:00 til 16:30 í Borgum.

Pizzur, gos og snakk í boði, gestir beðnir að taka með sér drykkjarföng og þáttökugjald er aðeins 3.000.-

Athugið aðeins hægt að greiða með peningum.

Aðgöngugjaldið gildir einnig sem happdrættismiði.

Höldum áfram að finna gleðina saman og förum brosandi inn í veturinn.

10. september er gulur dagur tileinkaður geðheilbrigði hvetjum því alla til að mæta í gula á kynningarhátíðina.

Birna og Theodór.

Föstudagur 22. ágúst 2025

Kæru Korpúlfar

Viljum byrja á því að þakka þeim fjölmörgu sem tóku þátt í aðstoð við dreifingu og póstburð á nýju starfsskránni okkar, ótrúlegur dugnaður, takk takk, sannaðist vel að margar hendur vinna létt verk.

Þeir sem nú þegar hafa ekki fengið hana senda, mun hún berast þeim næstu daga.

Þá óskum við þeim tæplega 50 Korpúlfum góðrar ferðar til Vestmannaeyja þriðjudaginn 26 ágúst,

vonum að allir hafi nú þegar greitt ferðina til Guðmundar Jónassonar.

Hópferðabíllinn leggur af stað stundvíslega kl. 7:30 á þriðjudagsmorguninn frá Borgum.

Þá vekjum við athygli á eftirfarandi breytingu í bréfinu: Fræðslufundur á vegum fræðslunefndar Korpúlfa um Hinsegin fræðslu frestast, í staðinn mun Júlíus Sólnes fyrsti orkumálaráðherra okkar koma í heimsókn miðvikudaginn 3. sept. kl. 13:00 í Borgir með fræðslu um Vindorkuver. Allir velkomnir.

Vonumst til að sjá ykkur sem allra flest 10. september kl. 13:00 í Borgum.

Gleðilega menningar helgi

Theodór og Birna.

Fimmtudagur 21. ágúst 2025

Þökkum góða þátttöku í sumarstarfinu og vonum að sumarið hafi verið ykkur heillaríkt.

Kynnum með stolti nýja fjölbreytta starfsskrá Korpúlfa með ósk um að sem flestir njóti með okkur, með virkni og heilsueflingu að leiðarljósi.

Starfsskráin okkar er í stöðugri þróun, þess vegna tökum við fagnandi á móti nýjum hugmyndum og ábendingum um félagsstarfið. Minnum á hugmyndakassann sem liggur frammi í Borgum. Áfram verður leitað í mannauð Korpúlfa eftir þekkingu og dýrmætri reynslu, það kærleiksríka sjálfboðaliðastarf verður aldrei fullþakkað.

Ennfremur þökkum við af alhug öllum þeim fjölmörgu sem styrkt hafa félagið á margvíslegan hátt. Korpúlfar innheimta ekki félagsgjöld en styrktarreikningur félagsins er 0370-22-084749 og kt. 601101-2460, margt smátt gerir eitt stórt.

Félagsstarfið hefst að fullum þunga í september og hvetjum alla til að mæta á kynningarhátíðina í Borgum miðvikudaginn 10. sept. kl. 13:00.

Leiðbeinendur munu kynna sín námskeið, svara fyrirspurnum og gleðigjafarnir hjónin Jóhanna Þórhallsdóttir söngkona og Óttar Guðmundsson geðlæknir mun gleðja okkur með gleðilegu skemmtiatriði.

Þá óskum við 50 Korpúlfum sem fara til Austurríkis 26. september góðrar ferðar. Hópferðabíll fer frá Borgum til Keflavíkurflugvallar kl. 03:30 og sækir hópinn við heimkomu. (Verð rútu 4.500.- báðar leiðir) greiðist inn á reikning Korpúlfa 0324-13-0920 kt. 601101-2460.

Biðjumst velvirðingar á að tveimur atriðum þarf að breyta í nýju starfsskránni, línudansinn fyrir byrjendur hefst kl. 9:00 alla föstudagsmorgna í Borgum og dansleikfimin 11:15 á mánudögum. Biðjum ykkur að leiðrétta í skránni.

Ýmislegt nýtt er í farvatninu m.a. fastir fræðslufundir á vegum fræðslunefndar Korpúlfa mánaðarlega, Ársæll byrjar á ný með leikfimi í Egilshöll vikulega á fimmtudögum hefst 9.október og Margrét á þriðjudögum byrjar 7. október.

Þá mun félagsstarfið í Grafarvogskirkju á þriðjudögum vera kl. 12:30 og færast yfir í Borgir frá 8. sept. Tréútskurðurinn á Korpúlfsstöðum hefst 15. sept.

Keila í Egilshöll 3. sept., Boccia í Borgum 2. sept., Postulínsmálun 1. sept. Qigong með Þóru hefst 17. sept. í Borgum, skákhópur Korpúlfa hefst 4. sept. og dansleikfimin byrjar 8. sept. kl. 11:15. Frísk í Fjölni í Egilshöll hófst 18. ágúst og listmálun með Pétri hefst 16. sept.

Hvetjum alla til að kynna sér vel hreyfiúrræðin sem eru í boði og taka þátt, hvetjum einnig til að prófa íþróttina Petan við Gufunesbæ er í boði þriðjudaga og fimmtudaga kl. 18 og laugardaga kl 10.

Annað félagsstarf Korpúlfa er nú þegar hafið eða endanlega ákvörðun hvenær það hefst ekki verið. tekin en verður auglýst síðar.

Fyrsti fræðslufundur fræðslunefndar Korpúlfa verður miðvikudaginn 3. sept. kl. 13:00 í Borgum hinsegin fræðsla, sem er þarft málefni og vonumst eftir góðri þátttöku. Hvetjum ykkur einnig til að kynna ykkur vel dagskrá menninganefndar Korpúlfa, alla fimmtudaga í vetur kl. 13:00.

Mikilvægt er að fylgjast vel með upplýsingastreymi á veraldarvefnum, heimasíðu okkar : korpulfarnir.com á upplýsingaskjá, töflu, tölvupósti og í Morgunblaðinu undir staður og stund.

Fyrsti félagsfundur Korpúlfa verður síðan 29. október kl. 13:00 dagskrá fundarins kynnt síðar.

Með ósk um öfluga þátttöku í félagsstarfinu í vetur nú á 28 ára afmælisári Korpúlfa.

Theodór Blöndal formaður Korpúlfa og Birna Róbertsdóttir verkefnastjóri.

Mánudagur 30. júní 2025

Aðventuferð Korpúlfa 2025.

Ferðanefnd Korpúlfa hefur verið í sambandi við Bændaferðir vegna aðventuferðar 2025.

Nú hefur borist tilboð frá Bændaferðum Aðventugleði í Kaupmannahöfn. 24 til 28. nóvember 2025.

Hámarksfjöldi er 49, fyrstir koma fyrstir fá.

Allar upplýsingar eru hér meðfylgjandi

áhugasamir verða að hafa bókað sig fyrir 1. ágúst á meðfylgjandi bókunarhlekk frá Bændaferðum.

Enginn skráningarlisti verður í Borgum vegna þessarar ferðar.

Í viðhengi er ferðalýsingin og hér er bókunarhlekkurinn í ferðina:

https://www.baendaferdir.is/baendaferdir/detail/2750/adventugledi-i-kaupmannahofn

Verðið er 209.900 kr. á mann í tvíbýli. 58.100 kr. aukagjald fyrir einbýli

Staðfestingargjaldið er 80.000 kr. á mann sem greiðist við bókun.

Bókun:

Hver og einn farþegi bókar sig sjálfur á vefnum og greiðir staðfestingargjald um leið. Farþegar eru þar af leiðandi ábyrgir fyrir sinni bókun, t.d. að nöfn farþega séu skrifuð eins og þau eru í vegabréfi.

Farþegar geta svo skráð sig inn á Ferðin Mín á heimasíðu Bændaferða þegar hentar og greitt aukalega inn á ferðina, en ferðin þarf að vera fullgreidd 8 vikum fyrir brottför.

Við bókun þurfa farþegar að skrá eftirfarandi upplýsingar:

Kennitala
Fullt nafn (eins og það stendur í vegabréfi)
Heimilisfang
GSM símanúmer
Netfang
Hverjir deila herbergi

Athugið að fyrir þá Korpúlfa sem vilja deila saman herbergi, þá er best að þær/þeir bóki sig saman í gegnum hlekkinn á ferðina og greiða staðfestingargjalið í einu lagi. Ef þær/þeir vilja bóka og borga í sitthvoru lagi þá þarf að hafa samband við skrifstofu Bændaferða.

Athugið að staðfestingargjald er í öllum tilfellum óafturkræft 5 dögum eftir að það hefur verið greitt og er bundið kennitölu farþega. Sjá almenna ferðaskilmála inni á heimasíðu Bændaferða: https://www.baendaferdir.is/um-baendaferdir/ferdaskilmalar-baendaferda

Með ferðakveðju

Ferðanefnd Korpúlfa.

Þriðjudagur 24. júní 2025

Sumarhreyfingin okkar

Gleður okkur hin góða aðsókn í sumar og Borgir verða opnar í allt sumar á venjulegum opnunartíma.

Leggjum áherslu á útiveru og hreyfingu í sumar.

Mælum með að prófa Petan við Gufunesbæ sem er stundað þrisvar í viku.

Qigong í Elliðaárdalnum með Þóru okkar Halldórsdóttir.

Einnig áhugaverðum sumargöngum með Sigurði Jóhannssyni göngustjóra :

Næsta ganga verður fimmtudaginn næsta 26 júní mæting kl. 9:30 í Borgir og sameinast í bíla.

Gengið á Úlfarsfell suður, tímalengd er um 2- 3 klst.

Gleði og gaman, allir hjartanlega velkomnir.

Þriðjudaginn 1. júlí verður gengið í Heiðmörk að Hólmsborg undir stjórn Sigurður Jóhannssonar tímalengd 2 klst. Mæting kl. 9:30 í Borgir. Vonumst eftir góðri þátttöku.

Fimmtudaginn 3. júlí verður farið í sumargöngu í Grafarheiði

gulur og rauður hringur með Sigurði Jóhannssyni göngustjóra.

Tímalengd 1-2 klst. Bætir, hressir og kætir.

Hittumst kl. 9:30 í Borgum og sameinast verður í bíla.

Bjóðum alla innilega velkomna í þessar skemmtilegu göngur,

meðfylgjandi mynd af göngufólki sem var að leggja af stað

brosandi í sumargöngu Sigurðar í morgun.

Vekjum einnig athygli á Korpúlfaferð til Vestmannaeyja 26 ágúst lagt af stað kl. 7:30 heimkoma kl. 21:00 Verð 26.500 skráning liggur frammi í Borgum.

Sjáumst sem oftast í allri sumardagskrá í Borgum.

Njótum saman útiveru í allt sumar

það verður gott og gaman.

Sumarkveðja Theodór og Birna.

Mánudagur 16. júní 2025

Ferðakveðja frá ferðanefnd Korpúlfa.

Óskum þeim 46 Korpúlfum sem leggja af stað ferðaglaðir í Þórsmörk næsta miðvikudag 18 júní góðrar ferðar.

Lagt af stað stundvíslega kl. 09:00 frá Borgum.

Leiðsögumaður verður Sigmundur Stefánsson.

Áætluð heimkoma kl. 20:00.

Einnig vil ferðanefnd Korpúlfa vekja athygli á dagsferð til Vestmanneyja 26. ágúst 2025 með Guðmundi Jónassyni.

Þátttökulisti hefur verið lagður fram í Borgum, með hámarksfjölda 60.

Emil Örn farastjóri. lagt af stað kl. 7:30 frá Borgum og áætluð heimkoma kl. 21:00.

Félagsmenn Korpúlfa hafa forgang en þátttökugjald er 26.500.-

Með gleðilegum ferðaóskum.

Mánudagur 02. júní 2025

Sumardagarnir okkar

Sumardagarnir okkar fara vel af stað með sól og gleði.

Við þökkum frábæra skráningu í Þórsmerkurferðina miðvikudaginn 18. júní og einnig þeim sem nú þegar hafa greitt þátttökugjaldið.

Lagt verður af stað stundvíslega kl. 09:00 og Sigmundur okkar Stefánsson verður leiðsögumaður og hefur skipulagt spennandi ferðadagskrá.

Áætluð heimkoma upp úr kl. 20:00. Góða ferð. Biðjum þá sem ekki hafa greitt vinsamlegast að greiða inn á reikn. Korpúlfa 0324-13-0920 kt. Korpúlfa 601101-2460 fyrir 10. júní Þátttökugjaldið er 18.000 kr. takk fyrir.

Minnum á að það er biðlisti í ferðina.

Fyrir áhugasama vil ferðanefnd Korpúlfa láta vita að laust er í haustferð Korpúlfa með ferðaskrifstofu Guðmundar Jónassonar til Brussel og Brugge 8 til 12 sept. 2025

þátttökulisti liggur frammi í Borgum.

Þá vil stjórn Korpúlfa minna á hreinsunardag við Borgir þriðjudaginn 10. júní, hafist handa kl. 10:00 og grillað kl. 12:00. Fyrir fram takk takk, margar hendur vinna létt verk.

Ýmislegt félagsstarf er að fara í sumarfrí næstu daga, en sumardagarnir okkar bjóða upp á margt skemmtilegt.

Meðal annars sundleikfimi, gönguhópa af öllum stærðum og gerðum, Boccia, spjallhóp og dansaður verður Línudans á föstudagsmorgnum í allt sumar.

Hannyrðir, Bridge, helgistundir, styrktar leikfimi, Canasta, Petan við Gufunesbæ og fleira sem verður auglýst sérstaklega.

Þá eru allir velkomnir í útiæfingar í Elliðaárdal yfir hluta sumarsins með Þóru Halldórsdóttir þegar veður leyfir.

Tilkynningar kynntar á Facebook síðunni hennar "Orkan í Öndvegi"

Einnig eru allir velkomnir í þriðjudags gönguferðir Sigurðar Jóhannssonar Korpúlfs sem eru auglýstar sérstaklega.

Göngu-Hrólfar bjóða einnig alla velkomna með í sumargöngur miðvikudaga kl. 10:00 í allt sumar,

dagskrá liggur frammi í Borgum.

Óskum ykkur ánægjulegra sumarstunda 2025. 😍

Birna og Theodór.

Myndlistasýning í Borgarbókasafninu Spöng.

Þriðjudagur 20. maí 2025

Maí mánuður kallar á okkur með sól og gleði.

Miðvikudag 21. maí samsöngur í Borgum kl. 13:00 með Elísabetu Halldóru gleðigjafa.

Miðvikudag 21. maí kl. 15:00 til 19:00 Sölu og handverksýning í Hraunbæ 105 og vöfflukaffi.

Fimmtudag 22. maí Sumarganga á Úlfarsfell og Hamrahlíðarskóg með Sigurði Jó. göngustjóra. Mæting kl. 9:30 í Borgir.

Fimmtudag 22. maí kl. 13:00 Bókmenntahópur í Borgum. Fjallað um bækurnar Æska, Bernska og Gift eftir Tove Ditlevsen.

ATHUGIÐ enginn matarþjónusta né kaffiþjónusta í Borgum eða Hraunbæ 22. maí vegna starfsdags starfsfólks í Borgum og Hraunbæ.

Föstudaginn 23. maí kl. 17:00 Vortónleikar Korpusystkina í Grafarvogskirkju undir stjórn Helga Hannessonar, Kristín Birna Óðinsdóttir gestasöngvari. Miðar seldir við innganginn kr. 2.500.-

Laugardaginn 24. maí kl. 14:00. Allir velkomnir á opnun myndlistasýningar, myndlistahóps Korpúlfa undir stjórn Péturs Halldórssonar í Borgarbókasafninu í Spöng.

Laugardaginn 24. maí Línudansferð til Akranes, dans kaffi og spjall kl. 14:00 til 16:00. Skráning hjá Siggu, rúta frá Mjódd kl. 12:30.

Minnum einnig á útæfingar í Qigong í sumar í Elliðaárdalnum með Þóru Halldórsdóttir þegar veður leyfir.

Njótum saman það er svo gaman.

Föstudagur 02.maí 2025

Maígleðin okkar.

Sumarið fer aldeilis vel af stað hjá okkur kæru Korpúlfar

* Við óskum þeim rúmlega 40 Korpúlfum góðrar ferðar til Ítalíu og minnum á að hópferðabíllinn í boði GJ leggur af stað stundvíslega kl. 04:30 4. maí frá Borgum. Einnig vinsamlegast þeir sem koma á bílum, bendum við á bílastæði aftan við bókasafnið og bílastæðin við Spöngina.

* Þá hefur ferðanefndin lagt fram þátttökulista í Borgum um Þórsmerkurferð 18. júní í Bása og kvöldverður á Stracta hóteli á heimleið, hámarksfjöldi í ferðina er 47 farþegar. Þátttökugjaldið er 18.000.- sem greiðist inn á reikn. Korpúlfa 0324-13-0920 Kt. 601101-2460.

* Ýmislegt í starfi okkar er að fara í sumarfrí t.d. er síðasti leikfimistími hjá Margréti Eiríksd. í Egilshöll er 20. maí. síðasti tími í postulínsmálun í Borgum 12. maí.

* Hvetjum alla til að taka frá föstudaginn 23. maí kl. 17:00 þá munu Korpusystkin gleðja okkur með söngtónleikum í Grafarvogskirkju, undir stjórn Helga Hannessonar.

* Laugardaginn 24. maí kl. 14:00 er opnunarhátíð samsýningar myndlistahóps Korpúlfa í bókasafninu Spöng undir stjórn Pétur Halldórsson, sýningin mun standa yfir til 7. júní 2025. Vonumst til að sjá sem allra flesta.

* Miðvikudaginn 21. maí eru allir velkomnir á sölu og handverksýningu Hraunbæ 105 frá kl. 15:00 til 19:00, vöfflusala frá kl. 15:00 til 16:00.

Njótum saman og höfum gaman vor og sumar 2025.

Birna og Theodór.

Föstudagur 25. apríl 2025

Félagsfundur 30 apríl 2025. Kveðjum veturinn og fögnum sumrinu saman.

Stjórn Korpúlfa boðar til gleðilegs félagsfundar næsta miðvikudag 30 apríl kl. 13:00 í Borgum.

Frá kl. 12:30 verður varpað upp myndum frá Kanadaferð Korpúlfa sem farin var 2017 teknar af Snorra Bjarnasyni.

Sérstakur gestur fundarins er Yngvi Björnsson með erindið Gervigreind og listin að læra.

Hann mun fjalla um ýmsar samfélagslegar áskoranir sem tilkoma slíkrar tækni hefur óhjákvæmilega í för með sér.

Þá munu Korpusystkin gleðja okkur með söng eins og þeim einum er lagið undir stjórn Helga Hannessonar.

Kl. 14:00 verður síðan slegið upp tónleikunum í Borgum Á ljúfum nótum. Tónlistarmennirnir Pálmar Ólason, Kristján Hermannsson og Grímur Sigurðsson ætla að heiðra okkur með tónlistarveislu og á efnisskránni verða mörg af vinsælustu perlum dægurlaga síðustu 50 ára.

Vekjum einnig athygli á eftirfarandi :

8. maí kl. 13:00 í Borgum. Guðjón Jensson kynnir bók sína, Löngu horfin spor. Njósnari nasista á Íslandi.

15. maí kl. 10:00 síðasta púttið á Korpúlfsstöðum fyrir sumarfrí.

16. maí kl. 13:00 síðasti dagur tréútskurðar á Korpúlfsstöðum fyrir sumarfrí.

22. maí starfsdagur starfsfólks Borgum og Hraunbæ, lokað á báðum starfsstöðum, nánar kynnt síðar.

23. maí Tónleikar Korpusystkina í Grafarvogskirkju, nánar kynnt síðar.

24. maí kl. 14:00. Opnunarhátíð myndlistarhóps Korpúlfa á bókasafninu í Spöng, nánar kynnt síðar.

Sumardagskrá verður síðan auglýst fljótlega.

Takk fyrir ánægjulegan vetur og gleðilegt sumar,

Theodór og Birna.

Föstudagur 11. apríl 2025

Heil og sæl

Næsta þriðjudag fellur niður leikfimi Korpúlfa í Egilshöll, þar sem salurinn er í notkun fyrir annað.

Í staðinn verður boðið upp á spennandi gönguferð þriðjudaginn 15 apríl kl. 10:00.

Safnast verður saman í einkabíla frá Borgum ekið í Grafarholt og gengið verður fyrir ofan Haukdælabraut,

göngustjórar verða Sigurður Jóhannsson og Margrét Eiríksdóttir. Allir hjartanlega velkomnir.

Vegna frídaga fimmtudaga í apríl :

Verður styrktar og jafnvægisleikfimin færð yfir á miðvikudaga, 16., 23 og 30 apríl.

Canasta verður í boði miðvikudaginn 16. apríl í Borgum.

Með hjartans ósk um gleðilega páskahátíð.

Birna og Theodór.

Mánudagur 07. apríl 2025

Kæru Korpúlfar

Stórtónleikarnir sem vera áttu á morgun þriðjudaginn 8. apríl í Borgum,

frestast vegna veikinda.

Verður auglýst síðar hvenær þeir verða.

En minnum á páskabingó skemmtinefndar Korpúlfa kl. 13:00 miðvikudaginn 9. apríl í Borgum.

Bókmenntahóp á vegum menningarnefndar Korpúlfa fimmtudaginn 10. apríl kl. 13:00 í Borgum.

Með hjartans kveðju,

Theodór og Birna.

Miðvikudagur 02. apríl 2025

Dagskrá í Apríl 2025

viðbót við hefðbundna fasta starfsskrá.

Miðvikudaginn 2. apríl kl. 13:00. Dagný Hermannsdóttir textílkennari kynnir vettlingahefðir Letta.
Fimmtudaginn 3. apríl kl.13:00. Myndasýning frá ferð Ingibjargar Óskarsdóttir til Nepals.
Fimmtudaginn 3. apríl kl. 13:00-16:00 Flóamarkaður í Hraunbæ 105.
Þriðjudaginn 8. apríl kl. 13:00 Stórtónleikar í Borgum. Tónlistamennirnir Grímur Sigurðsson, Kristján Hermannsson og Pálmar Ólafsson .
Miðvikudaginn 9. apríl kl. 13:00 Páskabingó í Borgum.
Mánudaginn 14. apríl kl. 13:00 Páskabingó í Hraunbæ 105.
Þriðjudaginn 22. apríl kl. 19:00-21:00 Danskvöld í Hraunbæ 105. Páll Sigurðsson skemmtanastjóri danskvöldsins.
Miðvikudaginn 23. apríl kl. 13:00 Logy tískusýning/sala gleði og gaman Borgum.
Laugardaginn 26. apríl ferð á Handverksýningu eldri borgara í Rangárvallasýslu, þátttökuskráning og nánari upplýsingar síðar.
Miðvikudaginn 30 apríl kl. 13:00 Félagsfundur Korpúlfa í Borgum, sérstakur gestur Yngvi Björnsson prófessor H.R. með fræðslu um gervigreind en nánari dagskrá fundarins kynnt síðar.

Athugið að styrktar og jafnvægisleikfimi í Borgum færist yfir á miðvikudagsmorgna

16 apríl, 23 apríl og 30 apríl vegna frídaga fimmtudaga.

Þriðjudagur 25. mars 2025

Tónleikar í Borgum þriðjudaginn 8.apríl kl 13.00

Á ljúfum nótum

Tónlistarmennirnir Pálmar Ólason, Kristján Hermannsson og

Grímur Sigurðsson, sem skemmt hafa Korpúlfum með söng og

hljóðfæraleik um árabil ætla að heiðra okkur með tónleikum í

Borgum þriðjudaginn 8.apríl kl. 13.00

Á efnisskránni verða mörg af vinsælustu perlum dægurlaga

síðastliðinna 50 ára

Missum ekki af þessum einstaka viðburði

Fimmtudagur 20. mars 2025

Félagsfundur á miðvikudag 26. mars í Borgum og margt fleira skemmtilegt.

Vonumst til að sjá ykkur sem flest á næsta félagsfundi Korpúlfa miðvikudaginn 26. mars kl. 13:00 í Borgum.

Harpa Sif Jóhannsdóttir og Sólveig Skaftadóttir frá Bændaferðum munu kynna 8 daga Korpúlfaferð 26. sept. til 3. október Alparósir Austurríkis.

Bergþóra Baldursdóttir sérfræðingur í sjúkraþjálfun ætlar að heiðra okkur með nærveru sinni og mun flytja okkur erindi um Byltuvarnir og svara fyrirspurnum.

Korpusystkin syngja, fleira gaman og kaffi á könnunni.

Deginum eftir 27 mars kl. 10:00 eru allir velkomnir með í Egilshöll þar sem rafíþróttadeild Fjölnis tekur fagnandi á móti hópnum. Þátttökulisti liggur frammi í Borgum.

Laugardaginn 29 mars kl. 20:30 er ykkur boðið tveir fyrir einn á í Salnum tónleikana Á Ljúflingshól í Kópavogi. (9.900.- tveir miðar ).

Fræðslunefnd Korpúlfa verður með áhugaverða heimsókn í Borgir um Lettneskt vettlingaprjón

miðvikudaginnn 2. apríl kl. 13:00 þegar Dagný Hermannsadóttir textílkennari mun segja frá vettlingahefðum Letta og kynnar okkur fjölbreytt vettlingamynstur.

Allir hjartanlega velkomnir í Borgir, alltaf.

Þökkum góða þátttöku síðustu viku og vonumst til að sjá ykkur sem allra flest á þeim viðburðum sem framundan eru.

Theodór formaður Korpúlfa og Birna.

Föstudagur 14. mars 2025

Kæru Korpúlfar

Gleðilega Þjóðleikhúsferð til þeirra 43 Korpúlfar sem ætla að sjá Eltum veðrið 16. mars.

Hópferðabíll leggur af stað kl. 19:15 á sunnudaginn við Borgir, mun stoppa við Safnhúsið stæði 6

og sækja hópinn aftur rúmlega 22:00 á sama stað að lokinni sýningu. Sýninginn hefst kl. 20:00 og miðarnir verða í leikhúsinu, sama á við þá 10 Korpúlfa sem fara á eigin vegum nafnalistinn er í leikhúsinu.

17. mars hefst á ný mánudags tréútskurður á Korpúlfsstöðum kl. 13:00 nú í umsjón Magnúsar Helga.
Allir hjartanlega velkomnir og sérstaklega vel tekið á móti byrjendum í tréútskurði.

Miðvikudaginn 19. mars er síðan dagurinn sem allir hafa beðið eftir Austfjarðadagur í Borgum
með fjölbreyttri dagskrá söngur og talað mál í umsjón Austfirðinga. Hátíðin sem enginn vill missa af hefst kl. 13:00 og allir hjartanlega velkomnir. Vonumst til að sjá sem allra flesta.
Fimmtudaginn 20 mars vekjum við athygli á smávægilegri breytingu hjá bókmenntahóp Korpúlfa, sem færist um viku, fellur niður 20 mars og verður í staðinn mars kl. 13:00 í Borgum,tekin fyrir bókin Ástarsaga Oddný.
Kl. 17:00 þann 20 mars er síðan Íbúafundur Grafarvogs í Borgum um þéttingu byggðar fyrir þá sem hafa áhuga.

Það verður gaman að upplifa með ykkur næstu viku og sendum ósk um góða helgi.

Birna og Theodór formaður Korpúlfa.

Mánudagur 10. mars 2025

Gleðifréttir til ykkar kæru Korpúlfar

Við fögnum nýrri Bingónefnd Korpúlfa með því að mæta öll á þeirra fyrsta Bingó á miðvikudaginn 12. mars kl. 13:00 í Borgum.

Sama góða verðið á bingóspjöldunum.

Á fimmtudaginn 13. mars verður mikill gleðidagur í Borgum því kl. 15:00 mætir Einar Már Guðmundsson rithöfundur og verndari menningarnefndar Korpúlfa og verður með bókakynningu og umfjöllun um sínar heimsfrægu bækur. Ath. breytt tímasetning.
Sama dag fimmtudagskvöldið 13. mars kl. 19:30 til 20:30 verða tónleikar í Borgum þrjár efnilegar hljómsveitir munu leika fyrir okkur undir stjórn Ólafar Elíassonar hljómsveitarstjóra. Enginn aðgangseyrir og allir hjartanlega velkomnir, gaman að taka með sér gesti, vini, börn og barnabörn í þessa tónlistarveislu.

Njótum og höfum gaman.

Birna og Theodór formaður Korpúlfa.

Föstudagur 28. febrúar 2025

Kæru Korpúlfar

Við þökkum góða þátttöku á aðalfundi Korpúlfa 26. febrúar, ánægjulega samvinnu og bjóðum nýja félagsmenn velkomna til starfa í nefndum félagsins.

Fimmtudaginn 6. mars kl. 13:00 mun Margrét Sölvadóttir kynna og sýna heimildarmynd um Verkfallið mikla 1955.

Takk fyrir góða skráningu í Þjóðleikhúsferðina sunnudaginn 16 mars á Eltum veðrið þátttakendur þurfa að greiða miðana fyrir 7. mars inn á reikning Korpúlfa kt. 601101-2460 banki 034-13-00920. Miðaverð 6.800.-. Miðaverð og rúta 8.800.- Lagt af stað kl. 19:15 frá Borgum 16. mars.

Áður auglýst námskeið með Guðfinnu í Steinamálun hefst þriðjudaginn 11. mars kl. 13:00 í Borgum. Hringt verður í alla þátttakendur.

Í Qigong hópnum á miðvikudaginn vaknaði hugmynd um Öskudagsgleði í Borgum á öskudaginn 5. mars 2025. Þeir sem hafa áhuga mæti í búningum og sleginn verði kötturinn úr tunnunni. Gleði og gaman.

Öll önnur dagskrá Korpúlfa samkvæmt starfsskrá.

Með hjartans ósk um góða helgi,

Theodór Blöndal formaður Korpúlfa og Birna.

Fimmtudagur 20 febrúar 2025

Kæru Korpúlfar

Uppstillingarnefnd Korpúlfa sendir hér viðhengi til kynninga, tillögur að stjórn og nefndum Korpúlfa 2025-2026.

Nöfn þeirra sem ekki sitja í stjórn eða nefnd á yfirstandandi starfsári eru skáletruð.

Aðalfundurinn verður síðan miðvikudaginn 26. febrúar 2025 kl. 13:00 í Borgum.

Sýndar verða myndir frá viðburðum á vegum Korpúlfa hálftíma fyrir aðalfundinn.

Venjuleg aðalfundarstörf,

sérstakir gestir verða Rakel Garðarsdóttir framleiðandi sjónvarpsþáttana um Vigdísi Finbogadóttir og Ragnar Ingi Aðalsteinsson.

Theodór Blöndal formaður Korpúlfa

ps: Deginum eftir 27. febrúar kl. 13:00 mun Dagþór Haraldsson bjóða upp á myndasýningu frá Víetnam.

Þá liggur frammi þátttökulisti í Þjóðleikhúsferð Korpúlfa sunnudaginn 16. mars að sjá leikritið Eltum veðrið.

Föstudagur 14. febrúar 2025

Aðalfundarboð Korpúlfa

Stjórn Korpúlfa boðar til aðalfundar Korpúlfa, félags eldri borgara í Grafarvogi.

Fundarstaður : Borgir, Spönginni 43, 112 R.

Fundartími : Miðvikudagurinn 26. febrúar 2025 kl. 13:00.

Formaður setur fund.
Kosning fundarstjóra og fundarritara
Korpusystkin syngja
Skýrsla stjórnar og umræða um hana
Framlagning ársreikninga til umræðu og samþykktar
Formaður kjörnefndar ber fram tillögu að stjórn og nefndum
Kosning stjórnar og nefndarmanna
Kosning skoðunarmanna reikninga
Þakkarorð
Gaman mál Ragnar Ingi Aðalsteinsson.
Rakel Garðarsdóttir framleiðandi leiknu sjónvarpsþáttanna um Vigdísi Finnbogadóttir segir frá þáttagerðinni.
Önnur mál
Kaffiveitingar í lok fundar.

PS: Dagþór Haraldsson ætlar að sýna myndir frá viðburðum á vegum Korpúlfa á skjá í fundarsalnum hálftíma fyrir aðalfundinn.

Vonumst til að sjá ykkur sem allra flest,

Stjórn Korpúlfa.

Mánudagur 10. febrúar 2025

Heil og sæl kæru Korpúlfar

Minnum á Korpúlfabingó næsta miðvikudag 12 febrúar kl. 13:00 í Borgum, allir hjartanlega velkomnir. Bingó og rjómapönnukökur.
Á fimmtudaginn 13. feb. kl. 13:00 mun sr. Petrína Mjöll Jóhannesdóttir rithöfundur gleðja okkur með nærveru sinni og kynna fyrir okkur margar góðar bækur sem hún hefur gefið út s.s. Salt og hunang, Stafróf ástarinnar og Hundrað og þrjú ráð. Vonumst til að sem flestir njóti með okkur.
Allt annað samkvæmt áður auglýstri dagskrá en nýtt kemur inn þriðjudaginn 18. febrúar kl. 13:00 því þá hefst námskeið í steinamálun með Guðfinnu Rósantsdóttir, áhugasamir skrái sig á þátttökulista sem liggur frammi í Borgum.
Stjórn Korpúlfa boðar til áður auglýstan aðalfundur Korpúlfa miðvikudaginn 26. febrúar kl. 13:00 í Borgum. Fundardagskrá kynnt næstu daga.

Með hjartans kveðju

Birna og Theodór.

Föstudagur 10. janúar 2025

Þorrablót aldarinnar og ein leiðrétting

Um leið og við óskum ykkur góðrar helgar er hér tilkynning frá Þorrablóts nefnd Korpúlfa sem allir hafa beðið eftir.

Sjá auglýsingu í viðhengi og þátttökuskráning liggur frammi í Borgum.

Síðan verða miðar afhendir með greiðslu 16 jan. 17. jan. eða 20 janúar milli kl. 11:00 til 14:00 í Borgum.

Athugið greiða þarf með peningum. Hámark 130 manns.

Miðaverð með öllu 10.000 krónur ( velkomið að taka með sér drykki, því þeir verða ekki seldir á staðnum)

Takið því frá miðvikudagskvöldið 29 janúar, fögnum þorranum saman á Þorrablót Korpúlfa í Borgum

Fyrir hönd Þorrablótsnefndar Korpúlfa.

ps: Leiðrétt dagsetning á myndasýningu Dagþórs Haraldssonar um Istanbúl og fleiri ferðamyndir,

myndasýningin verður í Borgum næsta fimmtudag 16. janúar kl. 13:00 allir hjartanlega velkomnir meðan húsrúm leyfir.

Birna og Theodór formaður Korpúlfa

Fimmtudagur 09. janúar 2025

Heil og sæl

Fyrir hönd ferðanefndar:

Þökkum hina miklu ferðagleði Korpúlfa uppselt er í ferðina til Ítalíu og verið að athuga með að fjölga í þá ferð.

Hér í viðhengi er síðan ferð Korpúlfa til Brussel 8. til 12. september 2025, einnig með ferðaskrifstofu Guðmundar Jónassonar og Emil Kristjánsson fararstjóri.

Farið verður í dagsferð til Brugge og í gönguferð um miðbæ Brussel. Endanlegt verð liggur ekki fyrir en er áætlað 209.500.-

Fljótlega verður lagður fram þátttökulisti í Borgum.

Viljum einnig vekja athygli á viðburði fimmtudaginn 16. febrúar kl. 13:00 á vegum menninganefndar Korpúlfa í Borgum.

Myndasýning frá ferðum Dagþórs Haraldssonar til Istanbul og jafnvel einnig myndir frá gönguferð hans á Hvannadalshnúk.

Minnum einnig á að félagsfundur Korpúlfa hefur verið færður til 22. janúar kl. 13:00 vegna Þorrablóts Korpúlfa sem verður haldið 29. janúar 2025.

Með hjartans kveðju

Theodór og Birna.

Fimmtudagur 09. janúar 2025

Áramótakveðja frá formanni

Kæru Korpúlfar.

Ég vil byrja á að óska ykkur öllum gleðilegt nýtt ár með þakklæti fyrir árið sem nú hefur kvatt. Árið 2025 er gengið í garð og ótrúlegt að það séu 25 ár liðin frá aldamótum. Það að upplifa aldamót er er ekki sjálfsagt og flestir foreldrar okkar voru bæði fædd og kvöddu okkur á síðust öld, jafnvel afar og ömmur.

Korpúlfar félag eldriborgara í Grafarvogi hófu starfssemi sína árið 1998. Það hefur ávallt verið lögð áhersla á að starfsemin byggðist á frumkvæði og hugmyndum félagsmanna og að við værum sjálfbær að mestu leyti og með stuðningi Reykjavíkurborgar hefur þetta tekist, eins og til var stofnað.

Það er meira að segja þannig að orðspor okkar hefur vakið athygli úti í hinum stóra heimi.

Þórhildur Guðrún Egilsdóttir, sem er deildarstjóri skrifstofu öldrunarmála hjá Reykjavíkurborg og Korpúlfur, var fengin á liðnu sumri til að halda fyrirlestur um félagsmiðstöðvar aldraða á Íslandi á ráðstefnu um öldrunarmál, sem haldin var í Kaupmannahöfn, þar sem fulltrúar frá öllum Norðurlöndunum og víðar úr Evrópu voru samankomnir.

Hún byggði fyrirlestur sinn á tilurð og starfi Korpúlfa.

Það er skemmst frá því að segja, að fyrirlesturinn vakti gífurlega athygli og fór hann og umfjöllun sem fylgdi langt fram úr tímarammanum sem henni var gefinn.

Í framhaldi af þessu hafa starfsystkini Þórhildar frá Osló komið í heimsókn í Borgir og nú fyrir skömmu tjáði Þórhildur mér að sænskir og finnskir starfsmenn í þessum geira, hefðu falast eftir upplýsingum frá Osló um þetta „fyrirbrigði“ á Íslandi.

Á vordögum árið 2005 hóf Birna Róbertsdóttir að starfa fyrir Korpúlfa.

Það var einstök gæfa að fá hana til starfa. Það þarf ekki að fara mörgum orðum um hennar störf, það finnum við Korpúlfar alla daga, auk þess er hún lítið gefin fyrir að henni sé hælt, en lætur frekar verkin og viðmótið tala.

Á komandi vori eru 20 ár frá því Birna hóf að starfa með okkur. Af þessu tilefni samþykkti stjórn Korpúlfa einróma, að félagið mundi gefa Birnu jólagjöf og var „sendiboði“ fenginn til að afhenda henni jólapakka sem opnast skildi á aðfangadagskvöld

Í pakkanum var svohljóðandi bréf:

„Kæra Birna okkar

Korpúlfar hafa ákveðið að gefa þér jólagjöf þetta árið , til að sýna þér á táknrænan hátt hversu mikið við metum starfið þitt í þágu okkar síðastliðin 20 ár.

Jólagjöfin er ferð með Korpúlfum til norður Ítalíu dagana 4. til 11. maí 2025

Gleðileg jól

Frá Korpúlfum“

Með þakklæti fyrir gott og árangursríkt samstarf á liðnum árum

Theodór Blöndal, formaður.

Mánudagur 06. janúar 2025

Ferðanefnd Korpúlfa kynnir hér tvær utanlandsferðir sem farnar verða 2025 ef næg þátttaka fæst 😊.

Ferð til Norður Ítalíu 4. til 11. maí 2025. Dvalið verður í bænum Stresa við Maggiore vatnið og farið í fjórar skoðunarferðir. Með ferðaskrifstofu Guðmundar Jónassonar, fararstjóri Emil Kristjánsson. Verð kr. 299.850.- ( í tveggja manna herbergi, með hálfu fæði/ hámark 38 manna hópur). Þátttökulisti hefur verið lagður fram í Borgum og þátttökuskráningu þarf að vera klár fyrir 1. febrúar 2025. Allar nánari upplýsingar og ferðalýsing meðfylgjandi þessum pósti í viðhengi (sjá ofar) og mun einnig liggja frammi í Borgum. Fyrstir koma fyrstir fá. Sjá nánari upplýsingar hér.
Einnig verður boðið upp á haustferð 26. september til 3. október 2025, á vegum Bændaferða, Alparósir Austurríkis. Þá verður dvalið í litlum bæ, Filzmoos og farið þaðan í fimm mislangar dagsferðir m.a. til Salzburg og með kláfi á Dachstein jökul. Endanlegt verð liggur ekki fyrir en verður líklega um kr. 300.000.- Nánar auglýst síðar.

GLEÐILEGT ferðaár með Korpúlfum 2025.

Föstudagur 03. janúar 2025

Gleðilegt ár.

Hjartans óskir til allra Korpúlfa um heillaríkt komandi ár með góðri heilsu, gleði og töfrandi stundum.

Stjórn og nefndir Korpúlfa eru strax farin að skipuleggja gleði og gaman ársins 2025.´

Vekjum athygli á : 😍

Korpúlfabingó á miðvikudaginn 8. janúar kl. 13:00 í Borgum
Auður Harpa byrjar mánudaginn 13. janúar, jóga með Gyðu Dís 7. janúar, styrktar og jafnvægisleikfimi með strákunum okkar 9. janúar og þóra með Qigong miðvikudaginn 15 janúar. Flest annað á dagskrá Korpúlfa er nú þegar byrjað eftir jólafrí.

Vöfflukaffið hófst á ný í dag, við mikinn fögnuð.
Næsti félagsfundur Korpúlfa verður miðvikudaginn 22. janúar kl. 13:00

Þorrablótsnefnd Korpúlfa mun fljótlega leggja fram nánari upplýsingar um Þorrablót ársins sem verður miðvikudaginn 29. janúar 2025 í Borgum, minnum á að taka daginn frá fyrir Þorrablótskvöld sem enginn vill missa af.

Margt fleira spennandi framunda sem gaman verður að segja frá við fyrsta tækifæri,

með hlýjum nýársóskum.

Theodór formaður Korpúlfa og Birna.