Heimsókn forseta Íslands
Fimmtudaginn 23. nóvember 2023 komu forsetahjónin Guðni Th. Jóhannesson og Elíza Reid í opinbera heimsókn í Borgir, ásamt borgarstjórahjónunum Degi B. Eggertssyni og Örnu Dögg Einarsdóttir og fylgdarliði, en borgarstjóri skipulagði heimsóknina. Þau borðuðu hádegisverð í Borgum dýrindis saltfisk með tilheyrandi og á meðan á borðhaldinu stóð kynnti Birna Róbertsdóttir og Theodór Blöndal formaður Korpúlfa fyrir þeim starfsemina í Borgum og svöruðu fyrirspurnum frá gestum. Dagur B. Eggertsson tók einnig til máls og sagði frá jákvæðri reynslu sinni af Korpúlfum og félagslegri virkni þeirra.
Ómar Ragnarsson heilsaði upp á hina tignu gesti og fór með frumsamda vísu fyrir þau.
Dagurinn byrjar á Degi,
degi hins lífsreynda manns,
sólskini á láði og legi,
í lífi forsetans.
Eftir góða máltíð og kaffisopa, voru Korpusystkin sönghópur
Korpúlfa búin að stilla sér upp inni í sal og sungu fyrir þau þrjú
lög undir stjórn Helga Hannessonar. Fengu mikið lófaklapp.
Síðan var gengið með forseta og borgarstjórahjónum um húsið
og þau heilsuðu m.a. upp á skákhóp Korpúlfa og gáfu sér góðan
tíma til að spjalla við fleiri gesti sem voru mætt í Borgir til að
fagna heimsókn þeirra.
Þann 1. desember 2023 barst okkur síðan hugljúft
þakkarbréf frá Bessastöðum.
Þökkum öllum þeim sem tóku þátt í að skipuleggja yndislega
heimsókn og öllum þátttakendum fyrir ánægjulegan dag.
Birna Róbertsdóttir.
